Tui leh Mei

A ruk tea ka vei

ka suangtuahna ram thununtu

Zaleng tin tluk zawh rual loh țha mualpui khum

Nang nen van zawlah sirvate iangin

Chimbal te phenah hmangaih thu kan hril.

"Tiam tlat e" tiin nang leh kei pialleiah

Lirnghing leh tui fawn ten min sawi nghing lo'ng

Mahse kan mizia erawh tui leh mei ang ni mah se

I tel lo chuan keimah hi ka keimah lo.

Nang Romeo, kei Juliet

Tuin nge min then hrang zo ang?

Pawh chah rual loh hmangaih hrui khat vuan kan ni si

I kiangah chuan a awm lo hliam leh na

Tar ha bal kan nih thleng vawng ang thu tiam te kha.

"Tiam tlat e" tiin nang leh kei pialleiah

Lirnghing leh tui fawn ten min sawi nghing lo'ng

Mahse kan mizia erawh tui leh mei ang ni mah se

I tel lo chuan keimah hi ka keimah lo.

An runah ka leng, ka phal lo tuma'n an bem

Ka lung na a hnem, ka tan a va hlu tak em!

Phatsan chu hnai lo ka neih chhun ka duh mah mah che

Hmangaihna dik an sawi thin chu hei le tunah ka tem.

'Par tin vulna lam lian hlobet hring dup hmun' zawh tura mawi

leh hleitling hian kei 'tualtopa' min thlang lawmthu ka sawi

'Ka pawm lum ka awi', hei lo liama 'pheichham man'

Vawi sawm pawh piang nawn ila a awm tawh dawn lo kei ang tan.

Min hnem teh nunnem, i zun ngai hi ka riang em a

Min en teh lunglen awmzia hi ka hrethiam ve ta

I kiangah chuan hriat chan tih ka nei ngai lo hliam leh na

Tar habal kan nih thleng in vawng reng ang aw thu tiam te kha.

Kei paw'n thutiam zawng kha vawng turin ka tiam a che

Karah hmelma hrangin selna leh diriamna te

Tawngin kan thinlung leh rilru te min hliam mah se

Kut suihin kan ti ang biak buk in thianghlimah.

"Tiam tlat e" tiin nang leh kei pialleiah

lirnghing leh tui fawn ten min sawi nghing lo'ng

Mahse kan mizia erawh tui leh mei ang ni mah se

I tel lo chuan keimah hi ka keimah lo.

I tel lo chuan keimah hi ka keimah lo.

Ka Neih Chhun

Chhingmit meng mawi te

Ka hnen rawn pan rawh le

Eng dawn lova indi riaiin

Hlimin tlai khua i var dun ang

Mahse maw bawihte

Ka tan i sang lua e

Cho loh val chu ni mah la

Ti mai lawh hian ka chang sang ka ti

Van angel em ni i nih mawina tinrenga thuam

Chhingmit inchuktuahin kawng chelhin ka banah vuan la

Lamtual i thai dun ang

Lanu val rual zingah

Nang ngei hi i lo ni e ka tan Khuanu duan

I tangah bei a thin thi a mutmu tuah ka nuam

Chawngmawi lei thimah

Ka tan khawnvar i iang e, Hrangchhuan

Suangtuahna ka nuihpui

I hlimthla ka hlimpui

Ka neih zawng zawng lo ni ta che

Ka neih chhun lo ni la

Hmangaihna dik a vang tunlai chhanah

Ka thinlung zawng hi i tan ka hlan

Mahse min tih keh chhiatsak suh

Ka neih chhun a nih kha

Rairah Vangin

Thinlai ruk rengah hian e

Ka han dawn vel thin a

Kei ka chan ve tawk rairah maw

A va na em tuar a har ngei

Mahse, ka tana Khua rel sa

Dan theih si loh kei ka tawnah

Damlai khawvel mangan buaina,

Tuar a har chuang rairah tan zawng

Kan neih rosum zawng te hi

A tlem lua e lenrual tawnah

Ka zuam lul lo tleitir chhai pawh

Ka bel tang e, kan run riang te hi

Mahse lunglai lo harh in

Tlei a har ngei kan run riangah

Tinkim dawn khawlin aw lairil a'n

Rai kan rah vang mai aw lo ni e

Hmangaih Di Lenmawi

Thal khaw tlai tla eng lenkawl eng rii riai

Romei zam riai leh murva siang lawi tur

Leng del del thlirin dawn lung zawla

Hlimte'n tlai tla eng kan tlir dun lai min ngaihzual tir e

I dawn ve thin em suihlung rual a

Tu dang ngai lo te a leng tawh hnu kha

Eng vang nge ni aw lung min her san

Doral iangin maw ka len tak le

Anka nem hmangaihnna mai em lo ni

Nunhlui dawn kirin tham ral mai tur an

Ka phal thei lo che hmangaih Di lenmawi

I tello chuan maw tlaini len a har

Nau ang min awm la buan ang min pawm rawh

Leng dang chhai tura'n ka phal lo che

'I tan chauh ka nun vawng zel nang'e' tia min tiam kha

Thing tin zar tinah hnah nem zawngte leh

Par mawi tin zawng te chuai in til mahse

Nun thar rawn chhuah in an par hring del

An nun hlui liam hnu ngai lo rengin, aw, bul zai an rel thin

Hmangaih Di Enchimloh

Ka di duhlai enchim loh

Eng vang nge maw ka lo tawn che

Ka thinlai lungrukah hian

An leng ve lo zaleng dang zawng

Lung phang lo la ka di duhlai

Ka pawm nang che kumtluang in

Run hmun len dun hma zawng 

Hmangaih di enchim loh

Chutin di lo ngai ve la

I tan rinawm kumtluang in

Awm zai lo rel ta ila

Tawng ve nang che hlim ni zawng

Chutin hmangaih biahthu zawng

Lungchim ten inhlan zel ila

Her chhuak thuai se kan tawnah

Aw run hmun len ni tur

Chunnu Bang Tawh Rawh

Ka zuapa a fam ta he lei khawharah

Ka chunnu leh unau te hrilh a hai ngei

Hnem ka thiam bik si lo lung ka vai ruai e

Luaithli an nul e tlai nitin in

Tap suh u, ka u leh nau te u

Bang tawh rawh, ka chunnu, bang tawh rawh

Zuapa zawng a leng ta, fam khawpui tual nuamah

Luaithli nul ban zai rel tawh rawh u

Chunnu leh unau te luaithli nul meuh chu

Zuapa tel lo chuan hnem zai ka rel thiam lo

Hnemtu tur pawh awm chuang si lo hian in maw

Zua ngaiin luaithli kan nul leh thin

Tawnmang Lova Lasi

Thlun beh anga dingin ngunthluin ka thlir a

A tang nem phen, a thinlungah sawn Pasaltha anga

Hmingthang vein a thinlung ram latu ni thei ila

Neitu niin hawntu ni thei ila

I mawinain min sal, min bual a, ka tui ral

Tawnmang lova lasi nula ka hnunah i cham,

Min zawl,min lem, min vel ,min zem, min dawi vai zo ta

Nang ngaia kur, sal tang, mi tang ka ni

An hril nunnem hmeltha

Thihna anchhia lawh theitu ni si

I mawinain min dawi a

Thinlung buan chak lo mi min chan ta

Lasi nunnem hmeltha

Thihna thal fang chuan min sai lo la

Nunnem an hril ang che hian

Thatnaa min dawr ka dil che

Siar Lalnu

Aw, ka lungdumtu kei ka tan siar lalnu

I lenna van thlirin zaiin i hming ka awi e

Engti zai zia nge ni ka phei chheh an thang i kam em ni

Nge, i mit mengah zawlaidi a zam zawk

I lungdum nan hian van angel aw mawi leh

Serafimte rimawi pawh phut la

Thihna thlan thim pelin ka han dil ang

Aw, ka lungdumtu hnarna anka min hlan suh

I tan ka tlin loh pawn buk lung bumin min buk tling la

Ka thisen zungzamah hian i zunzam a cham luat vang em ni

I zunah kei vala hi ka zam tak

Aw, ka lungdumtu kei ka tan siar lalnu

I lenna van thlirin zaiin i hming ka awi e

I riah run van zawlah khian ka rimawi lo thang khawk se

I tan zan muttuina hla lo chang se

I zan muttui nan hla ka hlan che

Hringnun Diary

Ka hringnun diary hi mite'n chhiar se

Phek 20-na atang i hming a ri ang

Hringnun kawng zawh hrang tura i liam hnu paw'n

A khat tawkin i hming ka thai lang leh thin.

Aw, hringnun hian

Kawp rem tura tuah rem a nei ang hian

Kawp rem lo tura

Duan sa an awm a nih dawn hi

Fur khua leh ruah tui chu kawp tura duan

Pangpar leh khuaite pawh kawp tura duan

Van zawla chhûm leh ni zung pawh kawp tura duan

Nang leh kei erawh hrang tura duan

Hmangaih Hmasa Ber

Di tam neiin di tam then tawh mah la

I thinlung neitu i nghilh bik lo'ng e

I hun hlui nunhlui nghilh in rei lo te atan

I pawm lai di nen hlim viau mah la

Hun lo her zelin riangin awm la

Tah chuan tu dang reng i ngai lo'ng

Tuman an hnem zo lo'ng che

Aw! ka thian, i hmangaih hmasa ber lo chuan

Di zawng zingah, aw, a hmasa ber chuan

Thinlung an luah an ral ve ngai lo

Kum sang tam dam in, di sang tam pawh nei mah la

A chhing zo tu reng i tawng mawlh lo'ng e

He thinlung mawl hian a chawi lian tu auvin

Tu dang reng a ngai lo, tuman an hnem zo si lo

Aw! ka thian, a hmangaih hmasa ber lo chuan

Aw! di hlui, aw, bul min tanpui tu

I zunzam hi anchhia nge mangchhia

I biahthu min hlan kha a hming dawt maw lo ni

Ka thinlung lah chu i luah khat reng si

Mittui lo hian maw ka tap leh thin

A tawp nan ka hmangaihna sang ber

Huatna nen ka hlan a che

Duhsakna der pawh "Hlim reng ang che," aw! Di Hlui